Saída ao centro de día Hera

Ola a todos/as:
O pasado mércores realizamos unha saída moi emotiva. Os Coelliños visitaron o centro de día onde traballa a nai da coelliña Sabela.
Chegamos ao centro e os maiores estaban agardándonos. Fixemos unha asamblea acerca da natureza e lles cantamos a canción "A horta de Balbina". Eles tamén nos cantaron unha canción que foi: "Vamos a contar mentiras, tralará". Despois tomamos unha rica merenda e por último axudáronnos a facer un bonito marcapáxinas.
Foi unha experiencia marabillosa ver como os nosos maiores estiveron tan contentos con nós, e tamén como os coelliños gozaron coas súas historias e agarimos.
Estamos seguros que esta saída hai que repetila, porque foi moi enriquecedora para todos/as.
Agradecemos a colaboración de todo o persoal do centro , en especial á nai de Sabela e a  César, Sonia e Alba que tamén quixeron acompañarnos.
Unha aperta.

Ruth

ASAMBLEA

MERENDA

MANUALIDADES

Fin do periodo de adaptación

Chegamos ao final do período de adaptación. A maioría dos nenos e nenas están adaptados ao novo espazo; a aula dos Coelliños, sen embargo aínda hai algúns aos que a mañá se lles fai un pouco longa. Pouquiño a pouco, e con moito agarimo, os nenos e nenas adaptaranse totalmente á nova situación.

Durante a semana pasada traballamos as rutinas de aseo e merenda, xogamos coa cociña, tren,  garaxe... Tamén pintamos e xogamos cos puzzles, saímos ao patio...

Tamén tivemos unha visita especial, Cuqui, o amigo de César que é un gato moi peculiar co que faremos moitas actividades en lingua inglexa.

Pero o que mais lles gusta aos coelliños e coelliñas e escoitar e aprender cancións: "Mi payaso juguetón", " Tengo un osito", "Sol, soliño", "Tic, tac, Tic, tac, é a hora de marchar", "Mi mono monín", "A mi mono le gusta la lechuga" e outras menos coñecidas coma "Trepsi el payaso".

Boa semana, Ruth

Benvidos Coelliños 2016

Benvidos ao curso 2016/2017, que seguro será un tempo estupendo, onde aprenderemos, xogaremos, experimentaremos... e sobre todo, intentaremos que os nenos e nenas sexan o mais felices posible.

Hoxe foi un día intenso xa que os novos coelliños e coelliñas acudiron ao centro por primeira vez. 

Foi todo bastante ben, agardamos que mañá sexa coma hoxe, pero se non é así, non vos preocupedes, pouquiño a pouco os nenos e nenas irán integrándose e adaptándose á nova situación.

Na clase, estaremos Angélica, Susana, César, Montse e mais eu, intentando que os nenos/as o pasen o mellor posible. Algúns días, mais adiante, viran Soles (psicomotricidade) e Chus (ensinanzas de relixión) e durante tres meses tamén estará Sonia que nos acompañará durante todas as clases.

Aquí vos deixo algúns momentos desta mañá.

Unha aperta.

Ruth